తెలంగాణ విద్యుత్ రంగ అభివృద్ధికి సీఎం రేవంత్ గట్టి చర్యలు

తెలంగాణ రాష్ట్రం విద్యుత్ సరఫరాలో అగ్రగామిగా నిలుస్తోందని సీఎం రేవంత్ రెడ్డి తెలిపారు. గతంలో కాంగ్రెస్ అధికారంలోకి వస్తే కరెంట్ కోతలు వస్తాయని బీఆర్ఎస్ నేతలు ప్రచారం చేసినా, ప్రస్తుతం రాష్ట్రం ఎక్కడా విద్యుత్ లోపం లేకుండా నడుస్తోందని ఆయన పేర్కొన్నారు. గత ఏడాదిన్నర కాలంగా uninterrupted power supply ఉండటం ప్రభుత్వ ఆచరణాత్మక విధానాలకు నిదర్శనమని చెప్పారు.

ఇటీవల సీఎం విద్యుత్ శాఖ అధికారులతో సమీక్ష నిర్వహించారు. ఈ సమీక్షలో 2025లో విద్యుత్ డిమాండ్ రికార్డు స్థాయికి – 17,162 మెగావాట్లకు చేరినట్టు వెల్లడైంది. అయితే డిమాండ్ పెరిగినప్పటికీ సరఫరాలో ఎలాంటి అంతరాయం లేకుండా నాణ్యమైన విద్యుత్‌ను అందించగలిగినందుకు అధికారులను సీఎం ప్రశంసించారు.

రాబోయే మూడేళ్లలో విద్యుత్ వినియోగం మరింత పెరగబోతుందని ముందుగానే అంచనా వేసిన ప్రభుత్వం, తగిన ఏర్పాట్లకు శ్రీకారం చుట్టింది. ముఖ్యంగా నీటిపారుదల, రవాణా, మెట్రో, డేటా సెంటర్, పారిశ్రామికవాడల అవసరాలను దృష్టిలో ఉంచుకుని విద్యుత్ ప్రణాళికలు రూపొందించాలని సీఎం అధికారులను ఆదేశించారు.

అలాగే:

• హైదరాబాద్ నగరంలో భూగర్భ కరెంట్ లైన్లు వేసే పని వేగంగా పూర్తి చేయాలన్నారు
• స్మార్ట్ పోల్స్‌ను ప్రాధాన్యతతో అమలు చేయాలని సూచించారు
• ఔటర్ రింగ్ రోడ్ పక్కన సోలార్ విద్యుత్ ఉత్పత్తికి వీలైన ప్రదేశాలను గుర్తించాలన్నారు
• కొత్తగా ఏర్పడే రేడియల్ రోడ్లు, శాటిలైట్ టౌన్‌షిప్‌లకు అవసరమైన విద్యుత్ అవసరాలపై ప్రత్యేకంగా దృష్టి పెట్టాలని చెప్పారు

రాష్ట్రానికి గ్రీన్ ఎనర్జీ, డేటా సెంటర్‌లను కలిపి ఓ పవర్ హబ్‌గా తీర్చిదిద్దే దిశగా ప్రభుత్వం ముందుకు సాగుతోంది. ఎక్కడా విద్యుత్ అంతరాయం లేకుండా, భవిష్యత్తు అవసరాలకు తగ్గట్లుగా సాంకేతికంగా ముందుగానే ఏర్పాట్లు చేయడం వల్లే, ఈరోజు తెలంగాణ విద్యుత్ రంగంలో దేశానికి ఆదర్శంగా నిలుస్తోందని విశ్లేషకులు అభిప్రాయపడుతున్నారు.