థియేటర్ బంద్‌పై జనసేన చేతకానితనం బట్టబయలు – సత్యనారాయణను బలి చేయడం తప్ప ఇంకేమీ కాదు
సినిమా థియేటర్లు మూసివేత వ్యవహారం రాష్ట్రవ్యాప్తంగా దుమారం రేపుతోంది. ఈ వివాదంపై జనసేన పార్టీ తీసుకున్న నిర్ణయం ఒక్కటే చెబుతోంది – ఇది తాను చేసిన తప్పుకు తప్పించుకోవాలనే ప్రయత్నం. రాజమండ్రి ఇన్‌ఛార్జ్ అత్తి సత్యనారాయణను సస్పెండ్ చేయడం ద్వారా అసలు విషయాల నుంచి ప్రజల దృష్టిని మళ్లించాలనే ప్రయత్నం చేస్తున్నట్టు రాజకీయ విశ్లేషకులు చెబుతున్నారు.
థియేటర్ బంద్ వెనుక కుట్ర ఉందని డిప్యూటీ సీఎం పవన్ కళ్యాణ్ ఆరోపిస్తున్నా, ఈ వ్యవహారంలో పార్టీ శ్రేణుల్లో ఉన్నవారే ప్రధానంగా కనిపించడమే ఆశ్చర్యం. సినిమాల ద్వారా ప్రజల్లో ఆదరణ పొందిన పవన్ కళ్యాణ్, ఇప్పుడు తన సినిమాకు వస్తున్న ఇబ్బందులపై అధికారులపై కాకుండా, స్వయంగా తన పార్టీలోని వ్యక్తిని బలిగా చూపించడంపై తీవ్ర విమర్శలు వస్తున్నాయి.
దిల్ రాజు, అల్లు అరవింద్ లాంటి ప్రముఖ నిర్మాతలు తమకు ఈ బంద్‌తో ఎలాంటి సంబంధం లేదని చెప్పినప్పటికీ, ప్రభుత్వం చేపట్టిన విచారణలో జనసేన నేతల పేర్లు వెలుగు చూస్తున్నాయి. తూర్పు గోదావరి జిల్లాలో మొదలైన ఈ వివాదం తెలంగాణ వరకు పాకడం కూడా గమనించదగిన విషయమే.
అత్తి సత్యనారాయణపై విచారణ ఇంకా జరుగుతున్నప్పటికీ, జనసేన ఆయనను తాత్కాలికంగా సస్పెండ్ చేస్తూ బయటకు చూపించడానికి ప్రయత్నిస్తోంది. కానీ అసలైన తప్పు పార్టీ నాయకత్వానిదే కాదా? ఒక పార్టీలో ఉన్నవాడు తప్పు చేస్తే,వెంటనే ఆయనను తొలగించడం న్యాయమా? లేక పార్టీలో ఉన్న తప్పులను కప్పిపుచ్చేందుకు చేయబడిన నాటకమా?
పార్టీ లోపల గానీ, నాయకత్వం వైపు గానీ స్పష్టమైన నియంత్రణ లేకపోవడంతోనే ఈ పరిస్థితి ఏర్పడిందని విమర్శకులు అంటున్నారు. తాము అధికారంలో ఉన్నప్పటికీ, సొంత పార్టీ వ్యక్తుల ప్రవర్తనను నియంత్రించలేని జనసేన ఎలా మంచి పరిపాలన చేస్తుందన్న సందేహాలు కూడా ప్రజల్లో నెలకొంటున్నాయి.
తాజా పరిణామాలు చూస్తుంటే, జనసేన ప్రజల సమస్యలకన్నా, సినిమా విడుదలకే ఎక్కువ ప్రాధాన్యం ఇస్తోందా అన్న భావన బలపడుతోంది. థియేటర్ల బంద్‌ను రాజకీయ అస్త్రంగా మార్చుకోవడంలో పార్టీకి ఎంత మేలు జరుగుతుందో తెలియదు కానీ, ప్రజల్లో పార్టీపై నమ్మకాన్ని మాత్రం తగ్గిస్తోంది.
