తెలంగాణ గర్వంగా నిర్మించిన అంబేద్కర్ విగ్రహాన్ని ఎందుకు చూపించలేదు? – వినోద్ కుమార్ స్పందన
మాజీ ఎంపీ వినోద్ కుమార్ అన్నారు, హైదరాబాద్‌కు వచ్చిన మిస్ వరల్డ్ పోటీదారులకు రాష్ట్రంలోని ఎన్నో ప్రాచీన, ప్రముఖ ప్రదేశాలను చూపించారు కానీ, అంబేద్కర్ విగ్రహాన్ని మాత్రం చూపించకపోవడం తగదు అన్నారు.
125 అడుగుల ఎత్తులో ఉన్న అంబేద్కర్ విగ్రహం తెలంగాణ గర్వకారణం అని పేర్కొంటూ, ఈ స్థలాన్ని మిస్ వరల్డ్ పోటీదారులకు పరిచయం చేయాల్సిందని అభిప్రాయపడ్డారు. ముఖ్యమంత్రి రేవంత్ రెడ్డి ఈ అంశాన్ని ఎందుకు విస్మరించారో చెప్పాలని కోరారు.
విజేతలు ఇప్పటికే చార్మినార్, రామోజీ ఫిల్మ్ సిటీ, రామప్ప గుడి, యాదగిరిగుట్ట వంటి ప్రదేశాలను సందర్శించారు. కానీ తెలంగాణ ఆత్మగౌరవానికి ప్రతీకగా నిలిచే అంబేద్కర్ విగ్రహం వద్దకు మాత్రం తీసుకెళ్లలేదు, ఇది బాధ కలిగించే విషయం అని అన్నారు.
జూన్ 2న మిస్ వరల్డ్ విజేతలు గవర్నర్‌ను కలవడానికి ముందు, అమరజ్యోతి వద్దకు తీసుకెళ్లాలని సూచించారు.
అంతేగాక, కాళేశ్వరం ప్రాజెక్ట్‌పై వచ్చిన నోటీసుల గురించి కూడా స్పందించారు. “నోటీసుల విషయమై పూర్తి సమాచారం వచ్చిన తర్వాతే స్పందిస్తాం,” అని స్పష్టం చేశారు.
