విశాఖ భూములపై ఆరోపణలు నిరూపించాలి లేదా బహిరంగ క్షమాపణ చెప్పాలి: మంత్రి లోకేశ్

ఆంధ్రప్రదేశ్ మంత్రి నారా లోకేశ్ మాజీ సీఎం జగన్‌మోహన్ రెడ్డిపై స్పందించారు. జగన్ ఉర్సా అనే ప్రైవేట్ కంపెనీకి విశాఖపట్నంలో భూమిని కేవలం ఒక రూపాయికే ఇచ్చారని చేసిన ఆరోపణను ఖండించారు.

లోకేశ్ సూటిగా చెప్పారు – ‘‘జగన్ చేసిన ఆరోపణ నిజమే అయితే నేను నా మంత్రి పదవికి రాజీనామా చేస్తాను. కానీ అది అబద్ధమైతే ఆయన యువత ముందుకు వచ్చి క్షమాపణ చెప్పాలి.’’

తాము అధికారంలోకి వచ్చిన తర్వాత రాష్ట్ర అభివృద్ధి కోసం పెట్టుబడులను ఆకర్షిస్తున్నామని, లక్షల ఉద్యోగాలు తీసుకురావడానికి ప్రయత్నిస్తున్నామని లోకేశ్ తెలిపారు. అయితే, జగన్ ఆ అభివృద్ధిని చూసి అసహనంతో తప్పుడు ఆరోపణలు చేస్తున్నారని ఆయన ఆరోపించారు.

‘‘వైసీపీ పాలనలో ఒక్క కంపెనీ కూడా రాష్ట్రానికి రాలేదు. ఉన్నవాటినే ఇతర రాష్ట్రాలకు తరిమేశారు. ఇప్పుడు మేము మంచి ఉద్యోగాలు తీసుకురావడాన్ని జగన్ జీర్ణించుకోలేకపోతున్నారు,’’ అని లోకేశ్ అన్నారు.

చివరగా, ‘‘ఈనో వాడితే జగన్‌కు రిలీఫ్ కలుగుతుందేమో’’ అంటూ లోకేశ్ వ్యంగ్యంగా వ్యాఖ్యానించారు.