శంషాబాద్ విమానాశ్రయంలో బాంబ్ బెదిరింపు కలకలం – చివరికి తప్పుడు బెదిరింపు అని తేలింది
కోల్‌కతా నుంచి వచ్చిన ఎయిర్ ఇండియా విమానంలో బాంబ్ బెదిరింపు సందేశం కనిపించి భయాందోళన కలిగించింది. విమానం బాత్రూంలో ఎవరో “బాంబు పేలుస్తా” అని రాసిన చీటి కనిపించడంతో సిబ్బంది వెంటనే పైలట్‌కు తెలిపారు.
పైలట్ ఈ విషయాన్ని వెంటనే ఎయిర్ ట్రాఫిక్ కంట్రోల్ (ATC) కు తెలియజేశారు. వెంటనే విమానాన్ని శంషాబాద్ ఎయిర్‌పోర్ట్‌లో అత్యవసరంగా ల్యాండ్ చేయించారు. అందులో ఉన్న ప్రయాణికుల్ని సురక్షితంగా కిందకి దించారు.
బాంబ్ స్క్వాడ్, డాగ్ స్క్వాడ్, CISF బృందాలు నాలుగు గంటల పాటు విమానాన్ని పూర్తిగా తనిఖీ చేశాయి. చివరికి ఇది తప్పుడు బెదిరింపు అని తేలింది.
ఈ ఘటనపై పోలీసులు దర్యాప్తు ప్రారంభించారు. బాంబు బెదిరింపు రాసిన వ్యక్తిని గుర్తించేందుకు సీసీటీవీ ఫుటేజ్‌లు పరిశీలిస్తున్నారు.
ఇటీవలి రోజుల్లో ఇలాంటి నకిలీ బెదిరింపులు ఎక్కువవుతున్నాయి. కొన్ని రోజుల క్రితమే ఇదే ఎయిర్‌పోర్ట్‌కి మరో బాంబ్ బెదిరింపు వచ్చింది. అదే విధంగా బెంగళూరులో ఓ స్కూల్‌కు కూడా తప్పుడు అలర్ట్ వచ్చింది.
అధికారులు చెబుతున్నదేమిటంటే – ఇలాంటి తప్పుడు హెచ్చరికలు ప్రజల్లో భయాన్ని కలిగిస్తాయి, అంతే కాదు విమానయాన సేవల్ని కూడా ప్రభావితం చేస్తాయి. అలాంటి పనులు చేసే వారిని కఠినంగా శిక్షిస్తామని అధికారులు హెచ్చరించారు.. ప్రజల భద్రతే మొదటి ప్రాధాన్యం అని స్పష్టం చేస్తున్నారు.
