విజయవాడ బాంబు బెదిరింపు కలకలం – పోలీసులు అప్రమత్తం
విజయవాడలో శనివారం ఉదయం బాంబు బెదిరింపు కాల్ కలకలం రేపింది. బీసెంట్ రోడ్డులో బాంబు పెట్టామని ఒక గుర్తు తెలియని వ్యక్తి పోలీస్ కంట్రోల్ రూమ్‌కు ఫోన్ చేశాడు. వెంటనే పోలీసులు అక్కడికి చేరుకుని అన్ని దుకాణాలు మూయించి, ప్రజలను ఖాళీ చేయించి, బాంబ్ స్క్వాడ్‌తో తనిఖీలు ప్రారంభించారు.
బీసెంట్ రోడ్ సాధారణంగా చాలా రద్దీగా ఉంటుంది. వ్యాపారులు, కొనుగోలు దారులతో కిక్కిరిసి ఉంటుంది. అలాంటి ప్రాంతంలో బాంబు బెదిరింపు రావడం వల్ల ప్రజల్లో భయాందోళనలు మొదలయ్యాయి.
ఇదే సమయంలో తిరుపతిలోని పలు హోటళ్లకు కూడా ఇటీవలి రోజుల్లో బాంబు బెదిరింపులు వచ్చినట్లు పోలీసులు తెలిపారు. దీంతో అక్కడ కూడా పోలీసులు తనిఖీలు చేపట్టారు. డీఎస్పీ వెంకట నారాయణ ఆధ్వర్యంలో హోటళ్లలో గాలింపు జరిగింది.
ఇక విజయనగరంలో జరుగుతున్న ఉగ్రదాడుల కేసుపై అధికారులు తీవ్రంగా దృష్టి పెట్టారు. సిరాజ్ మరియు సమీర్‌ అనే ఇద్దరు వ్యక్తులను NIA, ATS, ఇంటలిజెన్స్ అధికారులు ప్రశ్నిస్తున్నారు. సిరాజ్ కొన్ని ఆశ్చర్యం కలిగించే నిజాలు చెప్పాడు. ఓ గుర్తు తెలియని నెంబర్ నుంచి మెసేజ్‌లు, డబ్బులు వచ్చాయని, తాను ఉగ్రవాద శిక్షణ తీసుకున్నానని పేర్కొన్నాడు.
ఇప్పటికే రాష్ట్రం మొత్తం హై అలర్ట్ లో ఉంది. పోలీసులు ముఖ్యమైన ప్రాంతాల్లో భద్రతను పెంచారు. ప్రజలు అప్రమత్తంగా ఉండాలని, అనుమానాస్పదమైన విషయాలుంటే వెంటనే పోలీసులకు సమాచారం ఇవ్వాలని సూచిస్తున్నారు.
