విమాన ప్రమాద బాధితులకు టీమ్‌ఇండియా శ్రద్ధాంజలి – బీసీసీఐ పోస్టుతో భావోద్వేగం
గుజరాత్‌లోని అహ్మదాబాద్‌ విమానాశ్రయం నుంచి లండన్‌కు వెళ్తున్న ఎయిరిండియా బోయింగ్ 787−8 డ్రీమ్‌లైనర్ విమానం గురువారం ప్రమాదానికి గురైంది. ఈ దుర్ఘటనలో 265 మంది ప్రాణాలు కోల్పోయారు. ఈ విషాద ఘటనపై భారత క్రికెట్ జట్టు తీవ్ర విచారం వ్యక్తం చేసింది.
భారత జట్టు నివాళులు
ప్రస్తుతం ఇంగ్లండ్ పర్యటనలో ఉన్న టీమ్‌ఇండియా, బెకెన్‌హామ్‌లో అంతర్గత ప్రాక్టీస్ మ్యాచ్‌లో పాల్గొంటోంది. ఈ మ్యాచ్ ప్రారంభానికి ముందు భారత జట్టు సభ్యులు, సహాయక సిబ్బంది అంతా కలిసి విమాన ప్రమాదంలో మరణించిన వారికి మౌనంగా నివాళులు అర్పించారు.
అంతేకాకుండా, టీమ్‌ఇండియా సభ్యులు అనంతరం చేతులకు నల్ల బ్యాండ్‌లు ధరించి మ్యాచ్‌లో బరిలోకి దిగారు. ఈ సందర్భంగా తీసిన ఫోటోలను బీసీసీఐ అధికారిక ఎక్స్ (Twitter) ఖాతా ద్వారా షేర్ చేసింది. ఈ పోస్టును చూసిన అభిమానులు భావోద్వేగానికి లోనవుతున్నారు.
ఈ ఘటనలో మృతి చెందినవారికి అండగా నిలుస్తూ, క్రీడా వేదికపై తమ ప్రగాఢ సానుభూతిని తెలపడం ద్వారా భారత జట్టు మరోసారి దేశం పట్ల తమ బాధ్యతను చాటిచెప్పింది. టీమ్‌ఇండియా తీసుకున్న ఈ హృదయపూర్వక చర్య సోషల్ మీడియాలో ప్రశంసలు అందుకుంటోంది.
