సూపర్ స్టార్ ఫ్యామిలీ నుంచి కొత్త హీరోగా జయకృష్ణ – యువతరాన్ని టార్గెట్ చేస్తున్న అజయ్ భూపతి

టాలీవుడ్‌లోకి మరో యువహీరో రాబోతున్నాడు. దివంగత నటుడు రమేష్ బాబు కుమారుడు జయకృష్ణ తొలిసారి హీరోగా పరిచయం కానున్నాడు.ఈ సినిమాకు దర్శకత్వం వహించబోతున్న వ్యక్తి అజయ్ భూపతి.

ఆయన గతంలో RX100 మరియు మహాసముద్రం సినిమాలతో మంచి గుర్తింపు తెచ్చుకున్నాడు. ఈసారి కొత్త కథతో, కొత్త హీరోతో ప్రేక్షకులను ఆకట్టుకోవడానికి సిద్ధమవుతున్నాడు.

జయకృష్ణను లాంచ్ చేయబోయే సినిమా నిర్మాణ బాధ్యతను ప్రముఖ నిర్మాత అశ్వినీదత్ తీసుకున్నాడు. గతంలో మహేష్ బాబును కూడా పరిచయం చేసిన అశ్వినీదత్ ఇప్పుడు రమేష్ బాబు కుమారుడిని ఇండస్ట్రీకి పరిచయం చేయడం విశేషం.

ఈ సినిమాను మరో నిర్మాణ సంస్థ అయిన ఆనంది ఆర్ట్స్ కూడా భాగస్వామిగా నిర్మించనుంది. సినిమా టైటిల్, నటీనటుల వివరాలు, విడుదల తేదీ తదితర సమాచారం త్వరలో అధికారికంగా ప్రకటించనున్నారు.

ఇప్పటికే జయకృష్ణ ఎంట్రీపై సినీ ప్రేక్షకుల్లో ఆసక్తి నెలకొంది. ఫ్యామిలీ బ్యాక్‌గ్రౌండ్‌తో పాటు, టాలెంట్ ఉంటే మంచి హీరోగా ఎదగడం ఖాయం అని ఇండస్ట్రీ వర్గాలు ఆశాభావంతో చూస్తున్నాయి.

ఈ సినిమా ద్వారా జయకృష్ణ ఎలా ఆకట్టుకుంటాడో, దర్శకుడు అజయ్ భూపతి ఎలా మలుస్తాడో చూద్దాం!