హృతిక్ రోషన్ – హోంబలే ఫిలిమ్స్ కాంబినేషన్‌లో భారీ సినిమా! డైరెక్టర్‌గా పృథ్వీరాజ్?

బాలీవుడ్ స్టార్ హీరో హృతిక్ రోషన్ త్వరలో మరో పాన్ ఇండియా సినిమా చేయబోతున్నారు. ఈ సినిమాను కేజీఎఫ్, కాంతారా, సలార్ వంటి హిట్ సినిమాలు నిర్మించిన హోంబలే ఫిలిమ్స్ నిర్మిస్తోంది. ఈ వార్తతో హృతిక్ అభిమానుల్లో ఆనందం నెలకొంది.

ఈ సినిమాను నిర్మాత విజయ్ కిరగందూర్ ప్రకటించారు. “హృతిక్ లాంటి టాలెంటెడ్ హీరోతో సినిమా చేయడం గర్వంగా ఉంది. ఇది పెద్ద స్థాయిలో తీస్తాం” అని చెప్పారు. ఈ సినిమా త్వరలోనే సెట్స్‌పైకి వెళ్లనుంది.

ఇప్పుడు ఇండస్ట్రీలో చర్చ ఏమిటంటే – ఈ సినిమాకు డైరెక్టర్‌గా పృథ్వీరాజ్ సుకుమారన్ వ్యవహరించబోతున్నారని వార్తలు వస్తున్నాయి. పృథ్వీరాజ్ మంచి నటుడే కాక, సక్సెస్‌ఫుల్ డైరెక్టర్ కూడా. ఆయన గతంలో దర్శకత్వం వహించిన సినిమాలు హిట్ అయ్యాయి. ఇప్పుడు హృతిక్‌తో కలసి పని చేయబోతున్నారంటే అందరూ ఆసక్తిగా ఎదురు చూస్తున్నారు.

హృతిక్ ప్రస్తుతం ఎన్టీఆర్‌తో కలిసి వార్ 2 అనే సినిమాలో నటించారు. ఆ సినిమా షూటింగ్ పూర్తయింది. ఇది యష్ రాజ్ ఫిలిమ్స్ స్పై యూనివర్స్‌లో వస్తున్న మూవీ. ఆగస్టు 14న థియేటర్లలో విడుదల కానుంది.

ఇదిలా ఉండగా, హృతిక్ తన సూపర్‌హిట్ సిరీస్ అయిన క్రిష్ 4 సినిమాను కూడా తానే డైరెక్ట్ చేయబోతున్నాడు. అంటే హీరోగానే కాదు, దర్శకుడిగానూ హృతిక్ కొత్త ప్రయాణం మొదలుపెడుతున్నాడు.

ఇప్పటివరకు ఉత్తరభారత ప్రేక్షకులకు దగ్గరగా ఉన్న హృతిక్, ఇప్పుడు దక్షిణ భారత నిర్మాతలతో కలిసి సినిమా చేస్తుండటంతో ఈ ప్రాజెక్ట్‌పై దేశవ్యాప్తంగా ఆసక్తి పెరిగింది. ఈ సినిమాపై ఇప్పటికే భారీ అంచనాలు నెలకొన్నాయి. అధికారిక పోస్టర్, టైటిల్ వచ్చిన తర్వాత ఇంకోసారి ఈ సినిమా హైప్ మరింత పెరగడం ఖాయం.

హృతిక్, హోంబలే, పృథ్వీరాజ్ కాంబినేషన్ చూస్తుంటే, ఒక భారీ బ్లాక్‌బస్టర్ రాబోతుందని సినీ ప్రేమికులు ఆశిస్తున్నారు.