శివయ్య డైలాగ్ విషయంలో నేను తప్పు చేయలేదు: మంచు విష్ణు స్పష్టత

హీరో మంచు విష్ణు నటిస్తున్న భారీ ప్రాజెక్ట్ ‘కన్నప్ప’ సినిమా ఈ నెల జూన్ 27న విడుదలకు సిద్ధంగా ఉంది. ఈ సినిమా ప్రమోషన్‌లో భాగంగా అతను ఇటీవల మీడియాతో మాట్లాడాడు. అందులో “శివయ్యా” డైలాగ్ ట్రోలింగ్‌పై తన అభిప్రాయాన్ని వెల్లడించాడు.

కన్నప్ప సినిమాలో “శివయ్యా” అనే డైలాగ్‌ను ట్రోల్ చేసిన సంగతి తెలిసిందే. అదే డైలాగ్‌ను “సింగిల్” అనే మరో సినిమాలోనూ వాడటంతో వివాదం చెలరేగింది. దీనిపై మంచు విష్ణు నిర్మాతల మండలికి లేఖ రాశారంటూ వార్తలు వచ్చాయి. అయితే తాజాగా విష్ణు ఈ విషయం గురించి మాట్లాడాడు.

అతని మాటల్లో –
“అవును, నేను నిర్మాతల కౌన్సిల్‌కు లేఖ రాశాను. మన ఇండస్ట్రీలో ఎవరి మీదైనా ఎగతాళి జరిగితే, మనం అందరం కలిసి నిలబడాలి. మనలోని వాళ్లను తక్కువ చేస్తూ కామెడీ చెయ్యడం సరైంది కాదు. బాలకృష్ణ గారిని ఒక సినిమాలో అనుసరిస్తూ ట్రోల్ చేశారు. ఇదే పరిస్థితి నాకు వచ్చింది. మా సినిమాలో ‘శివయ్యా’ అనే డైలాగ్‌ను కూడా ట్రోల్ చేశారు,” అని అన్నారు.

అలాగే, “ఆ డైలాగ్‌ను తీయమని నేను అల్లు అరవింద్ గారిని అడగలేదు. వాళ్లే తీసేశారు. ఎందుకు తీసేశారో వాళ్లకే తెలుసు,” అని స్పష్టం చేశారు.

ఇప్పటికే కన్నప్ప టీజర్, పాటలు, పోస్టర్లు ప్రేక్షకులను ఆకట్టుకున్నాయి. ఈ చిత్రంలో ప్రభాస్, మోహన్‌లాల్, అక్షయ్ కుమార్ లాంటి స్టార్ హీరోలు కూడా ప్రత్యేక పాత్రల్లో కనిపించబోతున్నారు.